Prej 1 korrikut Maqedonia e Veriut merr presidencën me Procesin e Bashkëpunimit të Evropës Juglindore. Në samitin e liderëve dhe përfaqësuesve nga rajoni, presidenti i shtetit Stevo Pendarovski, ka shpalosur moton e udhëheqësisë me këtë nismë “Kalimi i ndarjeve, ndërtimi i besimit”. Ai theksoi se fokus të veçantë do të ketë luftimi i korrupsionit, pajtimi, bashkëpunimi rajonal dhe përshpejtimi i integrimeve euroatlantike. Duke folur për procesin eurointegrues të vendit, Pendarovski pranon se edhe përkundër përpjekjeve jemi larg mbylljes së kësaj sfide politike.
“Sipas paralajmërimeve, në dy javët e ardhshme do të duhet ajo iniciativë t’i kalojë procedurat në Qeverinë e Maqedonisë dhe pastaj të hyjë në parlament. Deri në këto momente ekzistojnë dialogje nga nivele të ndryshme politike. Pati edhe takim liderësh mes kryeministrit dhe liderit të opozitës, e cila edhe në këto momente ka vërejtje për bisedimet dhe nuk është e pajtimit t’i përkrahë ndryshimet kushtetuese. Disa hapa pozitive nga ai takim ka, megjithatë akoma jemi larg përmbylljes së këtij procesi.”, – deklaroi kryetar i shtetit, Stevo Pendarovski.
Mes tjerash, në samit është theksuar urgjenca e integrimit të Ballkanit Perëndimor dhe mbyllja e kontesteve bilaterale, gjithnjë duke pasur parasysh pasojat e agresionin rus mbi Ukrainën. Është diskutuar padyshim edhe raporti mes Kosovës dhe Serbisë. Presidenti malazez, Milatoviq, vendi i të cilit ka udhëhequr me iniciativën në fjalë, theksoi angazhimin e Podgoricës për stabilitet të vendeve që rrethojnë shtetin e tyre.
“Absolutisht përkrahim dialogun mes Beogradit dhe Prishtinës dhe shpresojmë në de-eskalimin e plotë të tensioneve javore që i kemi parë mes Beogradit dhe Prishtinës. Pozicioni i Malit të Zi është shumë i qartë: përkrahim dialogun nën ombrellën e BE-së, temë e cila ishte në samitin e sotëm dhe mendoj se u përcoll një mesazh i mirë i përbashkët, përfshirë edhe nga palët e Beogradit dhe Prishtinës dhe ai është: rajon stabil dhe prosperues drej BE-së, që është e vetmja e ardhme e jona e përbashkët.”, – theksoi presidenti i Malit të Zi, Jakov Milatoviq.
Në takim kanë marrë pjesë 13 përfaqësues të shteteve nga Evropa Juglindore. Kjo iniciativë është formuar në qershor të vitit 1996, me qëllim të thellimit të marrëdhënieve dhe bashkëpunimit ndërmjet vendeve të rajonit, si dhe promovimit të bashkëpunimit ekonomik dhe zhvillimit të qëndrueshëm.
