Masa e qeverisë për kufizimin e marzhës për produktet bazë përfundon nesër, por mbetet e paqartë nëse heqja e saj do të sjellë valë të re të shtrenjtimit të çmimeve. Zëvendësministri i Ekonomisë, Marjan Risteski, siguron se nëse çmimet vazhdojnë të rriten, do të pasojnë masa të reja, por më parë do të pritet të shihet se çfarë rezultate ka dhënë masa.
“Megjithatë, rezultatet përfundimtare do t’i presim javën e ardhshme. Nëse ka nevojë, do të vazhdojmë me masën, nëse nuk ka nevojë, atëherë ekonomia e tregut do t’i rregullojë çmimet. Shpresoj se, duke u bazuar në të kaluarën, të gjithë pjesëmarrësit në zinxhirin tregtar e kanë mësuar mësimin, që para së gjithash duhet të jenë qytetarët dhe mbrojtja e standardit të tyre”, tha Marjan Risteski – Zëvendësministër i Ekonomisë.
Ekonomisti Bujamin Bela, në një intervistë për Alsat, tha se nevojiten masa afatgjate, pasi sipas tij masat afatshkurtra nuk japin asnjë rezultat. Ai shtoi se çmimet në vend janë më të larta në krahasim me vendet evropiane.
Në lidhje me ligjin që obligon marketet të publikojnë çmimet në faqet e tyre zyrtare, Bela thotë se nuk është detyrë e qytetarëve të krahasojnë se ku është më lirë e ku më shtrenjtë. Ai shton se shteti duhet të ketë mekanizëm për të parë se sa respektohen këto ligje apo rregullat që i vendos shteti./Alsat.mk
