Deputetët e Kuvendit të Kosovës janë në pritje të një përgjigje nga Gjykata Kushtetuese për të vazhduar tutje në përpjekje të konstituimit të kuvendit.
Më datën 8 gusht është data kur kjo gjykatë do të dalë me një verdikt të ri. Vendimi i fundit që mori Kushtetuesja nuk prodhoi rezultat. Kosova tash e gjashtë muaj ka mbetur pa institucione të reja, që nga mbajtja e zgjedhjeve më 9 shkurt.
Nuk është hera e parë që deputetët i janë drejtuar Kushtetueses për t’ua zgjidhur mosmarrëveshjet politike. E kësaj radhe, pozitë e opozitë nuk arritën të sigurojnë votat e përbashkëta për të vazhduar tutje me formimin e institucioneve.
A mund të llogaritet kjo si një ‘paaftësi’ e deputetëve të zgjedhur? Analisti politik, Skender Zogaj thotë se, kjo legjislaturë e deputetëtve të Kuvendit të Kosovës, që nga koha e fushatës parazgjedhore e patën nisur punën mbrapsh.
“Për mua ka qenë ka qenë e pritshme që edhe rezultatin ta kishte të mbrapshtë! Listat zgjedhore të të gjitha partive politike kanë qenë aspak dinjitoze, madje të lyera me dhjam thiu, sepse, kandidaturat nuk e kanë pas kriter vlerën e kandidatëve ndaj shtetit, por e kanë pasë ndaj “shefqetit” që i ka saju listat. Prandaj një numër i madh i fituesve të votave janë bërë deputetë pa qenë të merituar për të hy në Kuvend”, thotë Zogaj.
Analisti Zogaj thotë se, kjo u vërtetu për 5 muaj radhazi kur deputetët e luajtën rolin e karaxhozëllëkut duke e degraduar në ekstrem lirinë dhe pavarësinë demokratike e njerëzve të Republikës së Kosovës.
“Por, më të poshtëruarit janë vet deputetët që u vet diskualifikuan dhe tash po mrizojnë duke pritur vendimin e Gjykatës Kushtetuese që t’ua tregoj ku e kanë vendin! Gjykata e shkretë e sikletosur nga sulmet politike dhe gjendja anarkike e vendit, e ka shumë vështirë të gjej zgjidhje ligjore problemeve politike që subjektet partiake i kanë krijuar jo paqëllim, por sepse janë në hall me vetveten, sepse e kanë humbur besimin e votuesve dhe nuk kanë i fije vizioni për vendin dhe popullin. Se çfarë do të jetë vendimi i Gjykatës kushtetuese nuk mund të paragjykoj, por e kam thënë dhe e them me bindje të thellë, duhet të hapet udha e zgjedhjeve të reja, sepse çdo lloj improvizimi i kalkuluar, e thellon krizën dhe e çon vendin kah kriza edhe më e thellë”, thekson ai.
Zogaj thotë se zgjedhjet e reja nëse mbahen, shumica e deputetëve të zgjedhur do ta kenë të pamundur të rizgjedhen.
“Zgjedhjet e reja nuk është se kanë për të prodhuar ndonjë “çelës magjik” por të paktën do të jetë rast i testimit të rezultatit të elektoratit, që duke qenë i mirënjohur me shfaqjen komiko tragjike të luajtur në Kuvendin e Kosovës, them bindshëm, shumicës së deputetëve nuk do t’ua mundësojë që të vazhdojnë të ulen në Kuvend! Pa ndodh kjo, nuk ka ecje përpara”, thotë ai.
