Pushteti do të shqyrtojë dy mundësitë për të bindur VMRO-DPMNE-në të votojë ndryshimet kushtetuese, njëra si tërësi dhe e dyta vetëm disa deputetë të nevojshëm për të rrumbullakësuar procesin, njofton zëvendës kryeministri për çështje eurointegruese Bojan Mariçiq. Sipas tij ka kohë të mjaftueshme që të arrihen 80 votat e nevojshme.
“Mënyra e parë është që VMRO-DPMNE si parti politike të jep mbështetje me kushte të caktuara, të cilat u diskutuan edhe në takimin e liderëve që u mbajt para dy muajve. Mënyra e dytë është që pjesë të deputetëve të vendosin për këto ndryshime kushtetuese siç ishte rasti para pesë viteve. Unë nuk shoh mënyrë të tretë, ndoshta ekziston, por këto janë dy opsionet. Ne do të punojmë në dy nivelet dhe konsideroj se nuk është e pamundur, përkundrazi është e mundur dhe kemi kohë dhe hapësirë të mjaftueshme të bisedojmë dhe arrijmë zgjidhje.”, tha zëvendës kryeministri për çështje eurointegruese, Bojan Mariçiq.
Sipas Mariçiq seanca e pezulluar do të caktohet atëherë kur do të krijohen kushte, gjegjësisht sigurohen votat e nevojshme dhe nuk thotë se ekzistojnë limite kohore për të mbledhur deputetët për këtë çështje.
“Seanca do të caktohet sërish, atëherë kur do të krijohen kushte. Ndërkohë ne po punojmë në kushtet për votim të suksesshëm në Kuvend. Në momentin kur do të caktohet seanca kjo do të nënkuptonte se i jemi përafruar shumicës së nevojshme. Mendoj se mbështetja tani shkon deri në 73 deputetë.”, tha Mariçiq.
Zgjedhjet nuk mund të ndryshojnë kërkesën europiane për të ndryshuar kushtetutën, vlerëson Mariçiq i cili fton opozitën të çlirojë popullatën nga populizmi i tyre. Komentet Mariçiq i bëri në kuadër të fushatës së nisur “Ne jemi Europë”, me të cilën do të binden qytetarët për rëndësinë e procesit europintegrues. Me këtë projekt që kap vlerën 5 milion denarë do të përfshihen 8 qytete deri në fund të shtatorit.
