Sot në Gjykatën Themelore të Prishtinës shpallet vendimi për ndihmës drejtorin e së ashtuquajturës Zyra për Kosovë në qeverinë e Serbisë, Igor Popoviqin.
Popoviqi ka pranuar fajësinë për nxitje të përçarjes dhe mosdurimit.
Sipas aktakuzës, Popoviq ka mbajtur një fjalim publik, me të cilin i është drejtuar një mase të gjerë qytetarësh, ku ndër të tjera ka përdorur gjuhë me përmbajtje nxitëse dhe urrejtëse, duke thënë: “…Serbët kanë pësuar këtu në rajonin e Rahovecit, Metohisë, Kosovës e Metohisë, për shkak se janë vendas dhe i kanë rrënjët këtu dhe nuk lejojnë që dikush t’i shpallë okupatorë, ardhacakë dhe t’i përzë nga këtu, nga UÇK – organizatë terroriste”, dhe më pas ka vazhduar të bëjë thirrje drejtuar qytetarëve, duke deklaruar: “Neve na mbetet të jemi krenarë për trimërinë e viktimave dhe vëllezërve të mbetur këtu dhe të mëtojmë që Hoça e Madhe dhe Rahoveci të mbeten serbe…” .
Prokuroria ka kërkuar dënimin sipas marrëveshjes që për veprën penale për të cilën është akuzuar të gjykohet me gjashtë muaj burgim e i cili dënim t’i zëvendësohet me dënim me gjobë në vlerë 3 mijë euro dhe në të njëjtën kohë t’i jepet dënimi i dëbimit të të huajit nga shteti i Kosovës për dy vite.
Ndërsa vendimi shpallet në orën 14:00, Prokuroria propozon që edhe masa e paraburgimit të ndërpritet.
