Ka ndërruar jetë në moshën 29-vjeçare, mjeshtri i madh amerikan i shahut dhe komentatori online Daniel Naroditsky. Familja e shahistit të njohur njoftoi vdekjen e tij të papritur në një deklaratë të lëshuar nga klubi i tij, Qendra e Shahut në Charlotte, të hënën, por pa specifikuar shkakun e vdekjes.
“Me hidhërim të madh ndajmë lajmin e papritur për ndarjen nga jeta të Daniel Naroditsky-t”, thuhet në deklaratë. “Daniel ishte një shahist i talentuar, komentator dhe edukator, si dhe një anëtar i çmuar i komunitetit të shahut, i admiruar dhe i respektuar nga tifozët dhe lojtarët në të gjithë botën.”
I lindur në San Mateo më 9 nëntor 1995, Naroditsky arriti titullin e mjeshtrit të madh në vitin 2013, në moshën 18 vjeç. Ai botoi dy libra mbi shahun, i pari prej të cilëve u botua kur ishte 14 vjeç.
Federatat amerikane dhe ndërkombëtare të shahut kanë shprehur ngushëllimet për ndarjen nga jeta të Naroditskyt, së bashku me lojtarë të tjerë profesionistë.
Amerikani numër dy në botë, Hikaru Nakamura, tha se ishte “i shkatërruar” nga lajmi.
“Kjo është një humbje e madhe për botën e shahut”, tha Nakamura në një postim në rrjetet sociale.
Naroditsky u interesua për herë të parë për shahun në moshën gjashtë vjeç, kur vëllai i tij më i madh Alan e prezantoi me lojën për të ndihmuar në argëtimin e një grupi fëmijësh në një festë ditëlindjeje.
Babai i tij, Vladimir, dhe shumë trajnerë e vunë re shpejt talentin e tij.
“Për sa më përket mua, unë thjesht po luaja lojëra me vëllain tim”, tha Naroditsky për Neë York Times në një intervistë të vitit 2022.
Ai fitoi vëmendje ndërkombëtare në vitin 2007 kur fitoi kampionatin botëror për të rinj nën 12 vjeç në Antalia të Turqisë. Në vitin 2010, në moshën 14 vjeç, ai u bë një nga autorët më të rinj të shahut të botuar ndonjëherë kur shkroi një libër të titulluar “Zotërimi i Shahut Pozicional”, i cili trajtonte aftësitë praktike dhe manovrimet teknike.
Naroditsky më vonë u diplomua nga Universiteti i Stanfordit dhe punoi si trajner shahu në Charlotte të Karolinës së Veriut.
Ndërsa ende garonte në ngjarje të nivelit të lartë, ai i transferoi talentet e tij në universin e shahut online.
Kanali i Naroditsky-t në YouTube fitoi gati 500,000 abonentë dhe transmetimi i tij në Tëitch mblodhi 340,000 ndjekës, me qindra mijëra shikues të tërhequr nga tutorialet e tij të rregullta me video dhe transmetimet e drejtpërdrejta kundër konkurrentëve. Tifozët vlerësuan mprehtësinë dhe pasionin e tij, duke iu referuar rastësisht si ‘Danya’.
