Në Likovë kanë përfunduar punimet rreth rikonstruimit të tërësishëm të katit të dytë në objektin e Shtëpisë së Shëndetit. Në përurimin e punimeve të sapopërfunduara ishin të pranishëm: ministër i Shëndetësisë, Arben Taravari, i shoqëruar nga zëvendëskryeministri, Arben Fetai, si dhe deputeti i zonës, Rijad Shaqiri.
Drejtori i këtij institucioni shëndetësor, Shkëlqim Musliji, i njoftoi të pranishmit me këtë investim kapital që u realizua së fundmi këtu.
“Një investim shumë i rëndësishëm për të gjithë personelin në Shtëpinë e Shëndetit në Likovë. Gjithashtu prezantuam edhe projektet tona, të cilat i kemi në plan për të ardhmen, si në zgjerimin e shërbimeve specialistike, po ashtu edhe në investimin në katin e parë, për të cilin prezantuam edhe projektin që shpresojmë që së shpejti të bëhet realitet. Brenda një periudhe katërvjeçare do t’i kemi edhe katër shërbime specialistike në Shtëpinë e Shëndetit në Likovë.”, – deklaroi drejtori i Shtëpisë së Shëndetit në Likovë, Shkëlqim Musliji.
Ndryshe, investimi në fjalë përfshinë komplet rikonstruimin e katit të dytë të objektit dhe i njëjti është donacioni nga ambasada kineze në vendin tonë dhe kap vlerën prej 15 mijë eurosh.
