Elon Musk dha edhe një sinjal se po tërhiqet nga administrata e presidentit amerikan, Donald Trump, duke thënë në një takim në Shtëpinë e Bardhë sot se ishte një nder të punonte me kabinetin e Trumpit.
Musk u tha investitorëve se do të rikthehej te Tesla ndërsa pritet që të ndalojë angazhimet në qeveri deri në fund të këtij muaji, përcjell Insajderi.
“Ju jeni trajtuar padrejtësisht, por shumica dërrmuese e njerëzve në këtë vend ju respektojnë dhe ju vlerësojnë jashtëzakonisht shumë, dhe e gjithë kjo sallë mund ta thotë këtë me bindje. Ju keni qenë një ndihmë e jashtëzakonshme”, i tha Trump, Muskut. “Je i ftuar të qëndrosh sa të duash. Në një moment, besoj, do të dëshirojë të kthehet në shtëpi, te veturat e tua”, shtoi lideri amerikan, shkruan cnn.
Kabineti e duartrokiti Muskun, i cili tha se i kishte kursyer 160 miliardë dollarë qeverisë federale, ndjeshëm më pak se objektivi fillestar prej 2 trilionë dollarësh. Por, muajt e fundit ai kishte filluar ta zbusë këtë pretendim, duke thënë në janar se 1 trilion do të ishte një “rezultat epik”.
“Shumë gjëra janë në proces. Ai numër mund të dyfishohet, madje edhe të trefishohet”, tha 78-vjeçari.
Trump e ka pranuar disa herë se Musk, në një moment, do të duhej të largohej dhe të rikthehej te kompanitë e tij.
Më herët këtë muaj, u raportua për një debat me zë të lartë mes Sekretarit të Thesarit, Scott Bessent, dhe Muskut — që zëdhënësja e shtypit e Shtëpisë së Bardhë, Karoline Leavitt, e quajti “pjesë e një procesi të shëndetshëm debati”.
Musk gjithashtu është përplasur me Sekretarin e Shtetit, Marco Rubio, për shkurtimet në Departamentin e Shtetit.
