Kancelari gjerman, Olaf Scholz i ka dënuar komentet e miliarderit Elon Musk dhe mbështetjen e tij të hapur për partinë gjermane të ekstremit të djathtë AfD.
Miliarderi teknologjik, Elon Musk e quajti Olaf Scholz një “budalla” dhe presidentit gjerman Frank-Walter Steinmeier iu referua si një “tiran antidemokratik”.
Tashmë kancelari ka reaguar ashpër.
Raportohet se Scholz po qëndron i qetë përballë sulmeve personale të miliarderit të teknologjisë Elon Musk kundër tij dhe politikanëve të tjerë të lartë, shkruan Stern.
“Si socialdemokratë, ne jemi mësuar që ka sipërmarrës të pasur mediatik që nuk e vlerësojnë politikën socialdemokratike – dhe nuk i mbajnë mendimet e tyre prapa skenave”, tha Scholz.
“Sigurisht, gjërat janë pak më ndryshe sot, sepse kompanitë dhe platformat mediatike tani kanë një shtrirje globale. Por nuk është asgjë e re në këtë çështje, duhet të qëndroni të qetë”, shtoi politikani i SPD-së.
“Më duket shumë më shqetësuese që Musk mbështet një parti ekstremiste pjesërisht të djathtë si AfD, e cila predikon afrimin me Rusinë e Putinit dhe dëshiron të dobësojë marrëdhëniet transatlantike”, vazhdoi Scholz.
Bëhet e ditur se këto reagime vijnë pasi në platformën e tij X, Musk e quajti Scholz një “budalla” dhe presidentin federal Frank-Walter Steinmeier një “tiran jodemokratik”.
“Presidenti nuk është një tiran antidemokratik dhe Gjermania është një demokraci e fortë dhe e qëndrueshme – Musk mund të thotë çfarë të dojë”, tha Scholz.
“Në Gjermani, gjërat bazohen në vullnetin e qytetarëve, jo në deklaratat e çrregullta të një miliarderi në SHBA”, u shpreh ai.
