Ministri për ҫështje evropiane, Orhan Murtezani, sot në mëngjes u takua me eurodeputetin austriak Tomas Vajc, raportuesin e sapoemëruar të Parlamentit Evropian për Maqedoninë e Veriut.
Takimi u zhvillua në prag të takimit të 23-të të Komitetit të përbashkët parlamentar Maqedoni e Veriut-Bashkimi Evropian, i cili paraqet mundësi të rëndësishme për të thelluar dialogun dhe për të përforcuar angazhimin e përbashkët për të ardhmen evropiane të vendit. Murtezani dhe Vajc theksuan rëndësinë e këtij forumi si hapësirë për shkëmbim konstruktiv të qëndrimeve dhe avancim të bashkëpunimit, me qëllim të përshpejtimit të integrimit të Maqedonisë së Veriut në Bashkimin Evropian.
Në fokus të bisedimeve ishin Agjenda Reformuese dhe Plani i rritjes së Komisionit Evropian për Ballkanin Perëndimor si lëvizës të procesit euro -integrues. Ministri Murtezani theksoi se Maqedonia e Veriut mbetet e përkushtuar ndaj reformave kyçe në sundimin e ligjit, luftën kundër korrupsionit dhe zhvillimit ekonomik, duke theksuar se këto përpjekje janë me rëndësi elementare për progresin e negociatave të aderimit. Eurodeputeti Vajc vërtetoi mbështetjen e Parlamentit evropian, duke theksuar se zbatimi i vazhdueshëm i reformave do të jetë faktor kyç në fazën tjetër të procesit.
Theks i veçantë u vendos edhe në Agjendën e Gjelbër, me ҫka Wajc e përshëndeti angazhimin e Maqedonisë së Veriut për rritje të qëndrueshme ekonomike dhe pavarësi energjetike përmes iniciativave të gjelbra. U theksua se Bashkimi Evropian, nëpërmjet Planit të rritjes dhe mekanizmave të tjerë të mbështetjes financiare, do të vazhdojë të mbështesë vendin në zbatimin e prioriteteve reformuese.
