Bartësi i listës së koalicionit VLEN për Këshillin e komunës së Çairit, Muhamed Murtezi, ka shprehur gatishmërinë për një debat të hapur dhe publik me kundërkandidatin e tij nga koalicioni AKI, si dhe me anëtarët e listës për këshilltar të këtij subjekti politik.
Murtezi thekson rëndësinë e ballafaqimit të ideve dhe programeve para qytetarëve, në mënyrë që ata të kenë mundësi të informohen drejt dhe të zgjedhin me vetëdije të plotë më 19 tetor.
“Jemi të hapur për debat miqësor dhe konstruktiv – në media, në lagje, në oda apo para kamerave dhe qytetarëve – për të prezantuar projektet dhe planin tonë katërvjeçar. Le të shohin qytetarët kush çfarë ofron dhe kush ka vizion real për Çairin,” thekson Murtezi.
Ai e konsideron këtë debat si një shenjë të pjekurisë demokratike dhe një mundësi për të treguar respekt ndaj qytetarëve përmes transparencës dhe qasjes së hapur ndaj sfidave lokale.
“Demokracia nënkupton mirëkuptim dhe respekt të ndërsjellë, dhe kjo arrihet më së miri përmes një fushate të qetë, të pastër dhe përmes mundësimit të qytetarëve që të gjykojnë vetë kush ka plan më të qartë dhe projekte më të realizueshme,” përfundon Murtezi.
VLEN, përmes këtij hapi sfidon koalicionin AKI dhe shpreh gatishmërinë për një garë të ndershme, transparente dhe me fokus në çështjet thelbësore për komunën e Çairit.
