Missi i parë kosovar, Afërdita Paqarada, ishte e ftuara e radhës në emisionin “Shok Podcast”, ku ndau me publikun një nga sekretet kryesore të bukurisë dhe vitalitetit të saj, edhe pas pesë dekadash jetë.
Në një bisedë të sinqertë përballë moderatorit Fis Juniku, Paqarada rrëfeu se një ndër faktorët kyç që ka ndikuar në shëndetin dhe energjinë e saj është regjimi i ushqimit që ndjek prej 14 vitesh.
Ajo tregoi se prej më shumë se një dekade nuk konsumon aspak mish të bardhë apo të kuq, duke shmangur gjithashtu edhe ushqimet e shpejta, të cilat i konsideron të pashëndetshme.
“Jam peshkatariane, nuk e ha fare mishin e kuq e as të bardhë,” tha Afërdita, duke zbuluar se i vetmi produkt shtazor që konsumon është peshku.
Ky stil jetese, i kombinuar me kujdesin për trupin dhe mendjen, duket se ka ndikuar ndjeshëm në ruajtjen e rinisë dhe vitalitetit të saj, duke e bërë një figurë të admiruar për disiplinën dhe stilin e jetesës së shëndetshme.
