Ministri francez i Drejtësisë, Gerald Darmanin dëshiron që të huajt e dënuar në Francë të vuajnë dënimin në vendin e tyre të origjinës, raportoi sot shtypi francez.
Synimi është zbutja e situatës në burgjet franceze, janë të mbipopulluara, por edhe dëbimi i personave që konsiderohen të padëshirueshëm, thuhet në një qarkore të dalë në shtyp.
Në dokument, Darmanin bën thirrje për një “politikë të fortë penale” që synon “shtetasit e huaj të dënuar përfundimisht”, duke qenë se ka “82,000 të burgosur për 62,000 vende” në burgjet francize, raporton Lusa.
Në një intervistë të publikuar nga Le Journal du Dimanche, e cila përkoi me publikimin e qarkores, ministri tha se në Francë ka “më shumë se 19,000 të burgosur të huaj”, sipas agjencisë spanjolle EFE.
Numri përfshin të paraburgosurit dhe të dënuarit, që përbën 24.5% të totalit.
Nga të gjithë të huajt, 3,068 kanë shtetësinë e një shteti tjetër të Bashkimit Evropian (BE), 16,773 të vendeve të treta dhe 686 kanë “shtetësi të panjohur”.
“Nëse këta të huaj, apo edhe disa prej tyre, do ta vuanin dënimin në vendet e tyre, nuk do të kishim probleme mbipopullimi. Dhe kjo pa qenë e nevojshme të liroheshin ata që nuk duhej të liroheshin”, tha ministri.
Darmanin i kërkoi administratës të identifikojë të huajt që janë dënuar përfundimisht, ata që nuk janë në pritje të apelit ose kanë çështje të tjera në pritje.
Ai kërkon gjithashtu të analizohet mundësia e lirimit të parakohshëm të disa prej tyre, kur dënimi parashikon që në fund të dënimit të dëbohen nga Franca.
Ministri synon ta bëjë më të rrjedhshme procedurën me vendet partnere nëpërmjet lirimit me kusht, që nënkupton vuajtjen e të paktën gjysmës së dënimit në Francë dhe që i dënuari të ketë një urdhër dëbimi.
