Ministri i Ekonomisë dhe Punës, Besar Durmishi, ka paralajmëruar masa rigoroze nëse çmimet e ushqimeve nuk stabilizohen brenda këtij muaji.
Në një takim të zhvilluar sot me përfaqësues të rrjeteve të mëdha të shitjes me pakicë, importues të ushqimeve, pijeve, frutave dhe perimeve, u diskutua hapur për çmimet aktuale dhe nevojën për t’i mbajtur ato nën kontroll.
“Do ta monitorojmë nga afër situatën gjatë gjithë këtij muaji. Nëse shifrat e inflacionit rriten përsëri dhe çmimet nuk rregullohen, do të propozoj masa rigoroze. Ndërhyrja në treg është e pashmangshme nëse nuk ka vetërregullim të mirë. Qytetarët duhet të mbrohen nga rritjet e pajustifikuara të çmimeve dhe çmimet nuk duhet të jenë një mjet për fitim në kurriz të standardeve të jetesës”, shkroi Durmishi në rrjetet sociale.
Ai shton se çdo masë që do të ndërmerret do të ketë për qëllim parandalimin e spekulimeve dhe garantimin e një tregu të ndershëm.
