Kryeministri i RMV-së, Hristijan Mickoski thotë se qeveria po kërkon zgjidhje afatgjate për çmimet e ushqimeve.
“Jemi të vetëdijshëm se kjo mund të ketë çmim politik, por më mirë ta paguajmë tani, në afat të shkurtër, sesa qytetarët ta paguajnë në vazhdimësi, në afat të gjatë”, deklaroi Mickoski, duke iu përgjigjur pyetjeve të gazetarëve lidhur me paralajmërimin e tij të djeshëm se Qeveria synon të sjellë “zgjidhje jo populiste, por afatgjata” për uljen e çmimeve të ushqimeve.
Mickoski theksoi se nuk ka asnjë dilemë dhe është plotësisht i gatshëm të përballojë një çmim politik të tillë.
“Absolutisht po, sepse jemi të vetëdijshëm – pasi kemi identifikuar problemin – se kjo mund të ketë një kosto politike, por më mirë në afat të shkurtër ta paguajmë atë çmim politik, sesa qytetarët ta paguajnë në vazhdimësi, në afat të gjatë”, nënvizoi ai, duke shtuar se masat që do të merren nuk do të jenë populiste.
Ai bëri të ditur se po kryhen analiza të hollësishme dhe se Qeveria nuk synon masa të përkohshme apo populiste, por zgjidhje të qëndrueshme për çmimet e ushqimit. Sipas tij, praktika ka treguar se kufizimi i marzhave vetëm i zhvendos rritjen e çmimeve në muajt e ardhshëm.
