Qeveria është në përgatitje të një ribalanci të buxhetit, si përgjigje ndaj projekteve të shumta që komunat kanë paraqitur në thirrjen e dytë për financim, njoftoi kryeministri, Hristijan Mickoski.
Ai sqaroi se bëhet fjalë për një shumë të konsiderueshme fondesh, që do të mundësojë komunave të shpallin tenderët dhe të nisin realizimin e projekteve.
Mickoski shtoi gjithashtu se për shkak të zgjedhjeve lokale, ribalanci pritet të miratohet në fund të qershorit dhe se së shpejti do të dalë përpara Kuvendit me një propozim konkret për ribalancin.
“Për shkak të implikimit në fondet e buxhetit, si rezultat i projekteve që komunat i kanë paraqitur për financim në thirrjen e dytë, është dashur të parashikohen fonde në buxhet. Bëhet fjalë për 15 miliardë denarë nga mjetet bazë të buxhetit, ndërsa kemi edhe bashkëfinancim, që e çon shumën totale në 16 miliardë denarë. Është e logjikshme, që të kalohet në një shpërndarje të tillë, që më pas komunat të mund të bëjnë ribalancë në buxhetet e tyre, të shpallin tenderë, të zgjedhin kontraktorë dhe të fillojë realizimi i projekteve nga kjo thirrje e dytë. Ka procedura ligjore dhe hapa që patjetër duhet të përmbushen. Sa i përket ribalancit të buxhetit, ju e dini se këtë vit kemi zgjedhje lokale. Me shumë gjasa, ribalanci do të jetë në fund të qershorit, por ende nuk është bërë një analizë përfundimtare. Ajo do të bëhet dhe më pas do të dalim përpara deputetëve me një propozim.”, – deklaroi kryeministri, Hristijan Mickoski.
Ribalanci i paralajmëruar synon të përshpejtojë implementimin e projekteve të reja infrastrukturore dhe zhvillimore në nivel lokal, duke ndihmuar komunat që të plotësojnë nevojat e komuniteteve të tyre përmes një mbështetjeje të drejtpërdrejtë financiare nga buxheti shtetëror
