Në këto zgjedhje lokale Lidhjen Socialdemokrate e pret edhe një tjetër debakël zgjedhor, deklaroi sonte nga Vevçani lideri i VMRO-DPMNE-së, Hristijan Mickoski.
Në tubimin para banorëve të Vevçanit, ai theksoi se megjithëse lideri i partisë opozitare Venko Filipçe tha se nuk do të zhvillojë fushatë negative, ai po e keqpërdor tragjedinë e madhe në Koçan dhe se, sipas Mickoskit, po përgatit një tradhti të re me të ashtuquajturat “linjat e kuqe” me Bullgarinë.
“Kjo është në fakt fytyra e vërtetë e opozitës, e cila në truket e saj të fundit të marketingut dëshiron të paketojë një dhuratë të re për fqinjin tonë lindor. Është një dhuratë që e quajtën Rezolutë ose linja të kuqe, pas së cilës LSDM dëshiron, natyrisht, të krijojë ndonjë lëshim të ri në kurriz të popullit maqedonas. Nëse propozimi francez ishte kaq i mrekullueshëm dhe Venko na thoshte se identiteti ishte i mbrojtur, atëherë pse na duhen këto linja të kuqe, të cilat janë pjesë e të ashtuquajturës rezolutë të LSDM-së. Përgjigja qëndron në faktin se LSDM, përsëri, dëshiron të bëjë ndonjë biznes të ri, i njohur për ta si një tipar karakteri nga e kaluara”, tha Mickoski.
Kryetari i VMRO-DPMNE-së, duke kërkuar besimin e banorëve të Vevçanit për të votuar në zgjedhjet lokale për kandidatin Spase Koçovski dhe bartësin e listës së këshilltarëve të udhëhequr nga Leon Daskaloski, vuri në dukje se në Vevçan jetojnë njerëz të ndershëm dhe mikpritës, të cilët dinë ta duan dhe ta mbrojnë Maqedoninë.
