„Nuk e di ku e kanë gjetur veten. Mos ndoshta i vret ndërgjegjja, dhe punon subkoshienca, Frojd është një punë e çuditshme. Por, unë nuk do të hyj në një debat të tillë,” deklaroi Kryeministri i Republikës së Maqedonisë së Veriut, Hristjian Mickoski, duke iu përgjigjur pyetjes gazetareske se çfarë nënkupton me çështjen maqedonase, pasi nga Athina e akuzuan për irredentizëm.
Ai theksoi se çështja maqedonase nuk do të mbyllet kurrë derisa të realizohen qëllimet kryesore dhe strategjike, dhe kjo është anëtarësimi i plotë i Maqedonisë së Veriut në Bashkimin Europian.
„Së dyti, ju e dini që Gjykata e të Drejtave të Njeriut ka sjellë një sërë vendimesh që lidhen me të drejtat e njeriut të komunitetit maqedonas në fqinjët tanë të lindjes, të cilat nuk respektohen. Po flasim për shekullin XXI, po flasim për një shtet anëtar të Bashkimit Europian që nuk i respekton të drejtat e njeriut të komunitetit maqedonas. Dhe kjo është një çështje që paraqet një problem serioz. E shihni se në shekullin XXI, ende sfidohet identiteti maqedonas. Do të ishte e papërgjegjshme, joserioze dhe tradhëtuese nga ana ime nëse do të thosha se çështja maqedonase është mbyllur. Nuk është mbyllur dhe do të luftoj për çështjen maqedonase derisa ta kryej këtë rol që kam, dhe ky është roli i Kryeministrit të Qeverisë maqedonase, sepse qytetarët e presin këtë nga njeriu që udhëheq Qeverinë maqedonase“, deklaroi Kryeministri Mickoski dhe shtoi:
„E di se në të kaluarën ka pasur njerëz që kanë udhëhequr Qeverinë maqedonase, të cilët çështjen maqedonase nuk e kishin as në mesin e 10 prioriteteve të para, por ju lutem të mësoheni me një Qeveri ku prioriteti kryesor i Kryeministrit është çështja maqedonase.“
