Zëvendës kryeministri i parë Izet Mexhiti, ka reaguar ashpër pas incidentit të ndodhur me gazetarin e njohur Naser Selmani, të cilit iu shpërthye goma e automjetit në rrethana të dyshimta.
Mexhiti e ka cilësuar këtë akt si të papranueshëm dhe si një goditje jo vetëm ndaj Selmanit personalisht, por edhe ndaj lirisë së shprehjes dhe të drejtës së publikut për informim.
“Shprehim shqetësimin më të thellë dhe indinjatën për sulmin e fundit ndaj gazetarit të njohur Naser Selmani. Ky akt i papranueshëm përbën jo vetëm një goditje ndaj tij personalisht, por edhe ndaj lirisë së shprehjes dhe të drejtës së publikut për t’u informuar lirshëm e pa frikë”, deklaroi Mexhiti.
Ai theksoi se çdo sulm ndaj gazetarëve është sulm ndaj demokracisë dhe institucioneve të saj. “Çdo tentativë për të frikësuar apo penguar punën profesionale të mediave është kërcënim i drejtpërdrejtë ndaj të drejtave themelore të qytetarëve dhe ndaj sundimit të ligjit”, shtoi ai.
Mexhiti kërkoi nga organet kompetente që të hetojnë me seriozitet rastin, të zbardhin plotësisht rrethanat dhe të sigurojnë që autorët të dalin përpara drejtësisë. Po ashtu, ai bëri thirrje që institucionet të garantojnë mbrojtjen e gazetarëve dhe një ambient pune pa presione, kërcënime apo dhunë.
Në fund, ai shprehu solidaritet të plotë me Selmanin dhe me gjithë komunitetin gazetaresk në vend, duke theksuar se liria e medias është themeli i një shoqërie demokratike dhe duhet të mbrohet me çdo kusht.
