Zëvendëskryeministri i parë, ministër i Mjedisit dhe Planifikimit Hapësinor dhe kandidat për kryetar të Komunës së Çairit nga koalicioni VLEN, Izet Mexhiti, ka vizituar lagjen Serovë, ku është pritur ngrohtësisht nga banorët në konakun e agës Galiq. “Serova është një vend që të bën të ndihesh si në shtëpi sapo kalon pragun. Banorët na pritën me zemër të hapur dhe çaj të ngrohtë, që e bëri bisedën tonë edhe më të afërt”, ka shkruar Mexhiti në një postim në rrjetet sociale. Gjatë takimit me banorët, Mexhiti dëgjoi sfidat e përditshme, kërkesat për përmirësimin e lagjes dhe idetë që presin të realizohen. Ai theksoi se shërbimi publik duhet të bazohet në dëgjim, respekt dhe angazhim të vazhdueshëm për t’u qëndruar afër qytetarëve. “U premtova me bindje se Serova do të zhvillohet edhe më shumë, me hapa të shpejtë dhe me përkushtim të plotë. Dera ime do të jetë gjithmonë e hapur për çdo qytetar, për çdo fjalë që duhet dëgjuar, për çdo dorë që kërkon mbështetje”, theksoi ai. Në fund, Mexhiti shtoi: “Jemi këtu për ta bërë Çairin më të mirë. Hap pas hapi. Së bashku.”
