Kandidati i VLEN-it për kryetar të komunës së Çairit, Izet Mexhiti ka takuar sot përfaqësuesit e ESNAF-it të Çarshisë së Vjetër të Shkupit. Qëllimi i takimit ishte diskutimi rreth projektit për restaurimin dhe konzervimin e kalldrëmeve.
Postimi i plotë:
Çarshia e Vjetër është themeli mbi të cilin është ndërtuar jeta qytetare e Shkupit. Aty ka marrë formë ritmi i përditshëm i qytetit, nga tregtia dhe mjeshtëria, te bashkëjetesa dhe ndjenja e komunitetit. Nëpër rrugicat e saj janë shkëmbyer mallra, dije dhe përvoja, ndërkohë që brez pas brezi janë rritur zejtarë që e kanë mbajtur këtë hapësirë gjallë me punë të ndershme e mjeshtëri.
Pikërisht në këtë zonë me vlerë historike po ndërhyjmë sot, me përgjegjësi të plotë dhe kujdesin që kërkon çdo detaj. Shumë shpejt do të nis projekti për restaurimin dhe konzervimin e kalldrëmeve, me një investim prej 29 milionë denarësh. Qëllimi është i qartë: të ruajmë dhe të përforcojmë identitetin e një hapësire që ka qenë gjithmonë zemra pulsuese e qytetit.
Projekti përfshin:
Rikonstruksion të plotë të kalldrëmeve;
Vendosje të kabllove nëntokësore;
Ndërrim të gypave të dëmtuar në rrugët Samarxhiska, Kovaçka, Petar Mihov dhe Saraçka.
Gjithçka do të bëhet në bashkëpunim të ngushtë me komunitetin e zejtarëve. Me përfaqësuesit e ESNAF-it sot kemi zhvilluar takim për të diskutuar çdo detaj të projektit, duke i siguruar se dinamika e punës së tyre dhe aktiviteti i përditshëm i Çarshisë, do të respektohet plotësisht. Dhe se do të ketë komunikim të vazhdueshëm, takime të rregullta dhe hapësirë për çdo sugjerim apo shqetësim që mund të paraqitet gjatë zbatimit.
Ky angazhim është vazhdimësi e përkushtimit tonë, për ta mbrojtur këtë hapësirë me vlera të rralla kulturore, historike dhe tregëtare, që është identitet i Shkupit.
