Zëvendëskryeministri i parë dhe kandidati për kryetar të komunës së Çairit nga koalicioni VLEN, Izet Mexhiti, ka njoftuar fillimin e një faze të re zhvillimi infrastrukturor në lagjen Gazi Babë. Gjatë një takimi me banorët në zemër të lagjes, Mexhiti prezantoi disa projekte konkrete që do të nisin ditët në vijim, me qëllim përmirësimin e jetës së përditshme të komunitetit.
“Nuk flasim për ndryshimin, e bëjmë atë”, theksoi Mexhiti, duke shtuar se prania e përhershme në terren dhe ofrimi i zgjidhjeve reale janë themel i angazhimit të tij politik.
Projektet e paralajmëruara përfshijnë:
Rekonstruktimi i rrugës Petre Georgiev, me një investim prej 5.476.415 denarësh;
Rekonstruktimi i rrjetit të ujësjellësit në rrugën Avram Pisevski, me vlerë 4.208.474 denarë;
Devijimi i kanalizimit fekal nga kolektori ekzistues atmosferik në rrugën 155, me investim prej 5.888.052 denarësh;
Rekonstruktimi i rrugës 157, që përfshin edhe rrjetin e ujësjellësit, kanalizimin fekal dhe atmosferik, si dhe ndriçimin rrugor, me kosto prej 4.582.460 denarësh.
Banorët e lagjes kanë pritur me interes këto zhvillime, duke u angazhuar në një bisedë të hapur për nevojat dhe prioritetet e ardhshme të zonës.
“Do të vazhdojmë të jemi aty ku ka nevojë, me zgjidhje reale dhe punë që shihet në terren”, përfundoi Mexhiti.
