Zv/Kryeministri i parë i Maqedonisë së Veriut, Izet Mexhiti, u takua sot me Ambasadorin e Republikës së Austrisë në Shkup, Sh.T.Z. Martin Pamer. Takimi u fokusua në thellimin e bashkëpunimit ndërmjet dy vendeve në fushën e mbrojtjes së mjedisit dhe zhvillimit të qëndrueshëm.
Në qendër të diskutimit ishte shkëmbimi i përvojave për menaxhimin e zonave të mbrojtura dhe parqeve kombëtare, me një vëmendje të veçantë për Parkun Kombëtar të Sharrit. Mexhiti theksoi rëndësinë e mbështetjes së partnerëve ndërkombëtarë dhe vlerësoi modelin austriak si një shembull të suksesshëm të harmonizimit të turizmit me mbrojtjen e natyrës.
“Përvoja e Austrisë në këtë fushë do të na shërbejë si udhërrëfyes për zhvillimin e qëndrueshëm të resurseve natyrore në vendin tonë”, deklaroi Mexhiti pas takimit.
Austria, me 17 parqe kombëtare dhe standarde të larta të menaxhimit mjedisor, mbetet një partner kyç për nxitjen e praktikave të mira në Ballkanin Perëndimor.
