Zëvendëskryeministri i parë i Qeverisë së Maqedonisë së Veriut dhe kandidati i koalicionit VLEN për kryetar të Komunës së Çairit, Izet Mexhiti, ka nisur ditën me një vizitë pune në terren, ku ka inspektuar nga afër punimet në Lagjen Fushë Topanë. Vizita kishte për qëllim mbikëqyrjen e ndërtimit të njërit prej lokacioneve për parkingje të planifikuara nga Komuna e Çairit.
Sipas Mexhitit, ky projekt synon përmirësimin e infrastrukturës urbane dhe zgjidhjen e një problemi të kahershëm me mungesën e hapësirave për parkim – një sfidë që ka prekur përditshmërinë e shumë banorëve të zonës.
“Kjo është një ndërhyrje konkrete që sjell lehtësim të drejtpërdrejtë për qytetarët dhe tregon se kur punohet me seriozitet, rezultatet janë të prekshme,” theksoi Mexhiti.
Ai gjithashtu bëri të ditur se përkushtimi për transformimin urban do të vazhdojë në çdo lagje të komunës, duke theksuar rëndësinë e vendimmarrjes së bazuar në nevojat e qytetarëve.
