Sot, në takimin koordinativ në Qeveri, së bashku me ministra, zëvendësministra, kryetarë komunash dhe përfaqësues të institucioneve përkatëse, diskutuam mbi masat që janë ndërmarrë për përmirësimin e cilësisë së ajrit.
Takimi u zhvillua në kuadër të zbatimit të Planprogramit për Ajër më të Pastër 2024–2030 dhe Planit të Veprimit për sezonin e ngrohjes 2024–2025, të miratuara nga Qeveria me propozim të Ministrisë së Mjedisit Jetësor dhe Planifikimit Hapësinor. Qëllimi ynë është i qartë: të përmirësojmë cilësinë e ajrit dhe të mbrojmë shëndetin e qytetarëve.
Gjatë takimit, u prezantuan veprimet konkrete që janë ndërmarrë në terren, përfshirë:
• Inspektime të jashtëzakonshme të mjeteve motorike dhe industrisë;
• Kontroll të përforcuar në kantierët e ndërtimit dhe ndalimin e zjarreve në hapësira të hapura;
• Pastrim dhe larje të rregullta të rrugëve nga ana e komunave;
• Shqiptim të gjobave dhe masave ndëshkuese ndaj shkelësve të rregullave mjedisore.
Për më tepër, gjithashtu çdo institucion i ngarkuar është i obliguar të dorëzojë raporte të detajuara në Ministrinë e Mjedisit Jetësor dhe Planifikimit Hapësinor çdo javë, për të siguruar një monitorim të vazhdueshëm dhe koordinim të masave në nivel qendror dhe lokal. Ky proces është i rëndësishëm për të siguruar përparim dhe transparencë në zbatimin e masave dhe për të vlerësuar efektivitetin e tyre.
Në përfundim, diskutuam gjithashtu për progresin në miratimin e Ligjit për Emisionet Industriale dhe krijimin e qendrave rajonale për menaxhimin e mbetjeve, një proces që është tashmë në fazën e zbatimit, me fonde të siguruara.
Përfaqësuesit institucionalë duhet të vazhdojnë me angazhimin e tyre aktiv, të raportojnë rregullisht dhe të ndajnë sfidat që hasin, në mënyrë që të ndërmarrim së bashku hapa të efektshëm për përmirësimin e mjedisit dhe ajrit që thithim çdo ditë.
