Zv/kryeministri i parë dhe kandidati për kryetar të Komunës së Çairit nga koalicioni VLEN, Izet Mexhiti, ka bërë të ditur se janë siguruar 65 milionë euro për nisjen e dy projekteve madhore në Shkup: ndërtimin e Kampusit Universitar “Nënë Tereza” dhe parkingut nëntokësor në Sheshin Skënderbeu.
Sipas Mexhitit, këto projekte do të sjellin përfitime afatgjata për studentët, qytetarët dhe zhvillimin ekonomik të kryeqytetit.
“Sot zhvillova një takim të rëndësishëm me Ministrin e Transportit, Aleksandar Nikollovski, Drejtorin e Inspektoratit të Ndërtimit dhe përfaqësues të Komunës së Çairit, ku u dakorduam për hapat konkretë që sigurojnë fillimin e menjëhershëm të këtyre projekteve”, theksoi ai.
Mexhiti u shpreh se këto investime vendosin themele të reja për modernizimin urban dhe arsimor të Shkupit, duke e futur qytetin në një fazë të re zhvillimore.
“Falë koordinimit ndërinstitucional dhe përkushtimit të përbashkët, shumë shpejt do të nisë zbatimi në terren i këtyre projekteve me rëndësi kombëtare dhe strategjike. Ne i mbajmë premtimet dhe e kthejmë vizionin në realitet”, përfundoi Mexhiti.
