Zëvendëskryeministri i parë i Maqedonisë së Veriut, Izet Mexhiti, ka përshëndetur sot arrestimin e njërit prej tifozëve të përfshirë në thirrjet fashiste dhe anti-shqiptare që u dëgjuan në Kumanovë gjatë ndeshjes së basketbollit mes Maqedonisë së Veriut dhe Rumanisë.
Në një status në rrjetet sociale, Mexhiti theksoi rëndësinë e reagimit të shpejtë të institucioneve shtetërore dhe dërgoi një mesazh të qartë kundër gjuhës së urrejtjes:
“Përgëzoj institucionet për reagimin e shpejtë dhe punën efektive në këtë rast. Mesazhi është i qartë: gjuha e urrejtjes nuk do të tolerohet.”
Krahas këtij zhvillimi, ai uroi me entuziazëm ekipin e futbollit Shkëndija, që sonte përballet me Qarabagun në një ndeshje të rëndësishme ndërkombëtare.
“E gjithë vëmendja jonë është te krenaria e futbollit, Shkëndija. Uroj me zemër që të dilni me kokën lart nga kjo përballje dhe të vazhdoni të na përfaqësoni denjësisht në arenën ndërkombëtare.”
Izet Mexhiti ftoi tifozët shqiptarë që ta mbështesin Shkëndijën me kulturë sportive dhe dinjitet kombëtar, duke theksuar rëndësinë e sjelljes shembullore në stadium.
“Sonte, ta tregojmë atdhedashurinë me sjellje shembullore, jo me gjuhë urrejtjeje ndaj askujt.”
Sonte le të jemi të gjithë një zë i vetëm për Shkëndijën – me zemër, me kulturë dhe me krenari. Le të jetë kjo ndeshje shembull se si sporti bashkon, forcon identitetin dhe e lartëson kombin.
