Në 24-vjetorin e masakrës së Lubotenit, ku në vitin 2001 u vranë mizorisht 10 civilë të pafajshëm, zëvendëskryeministri i parë Izet Mexhiti nderoi kujtimin e tyre së bashku me Arben Fetahin, Bilall Kasamin, Visar Ganiun dhe Zeqirija Ibrahimin. Delegacioni vizitoi varret e viktimave, u takua me familjarët dhe banorët e Lubotenit, duke ndarë dhimbjen që, sipas Mexhitit, “mbetet e pashuar”.
Ai e cilësoi këtë ngjarje si një plagë të hapur në ndërgjegjen kolektive dhe një kujtesë të përhershme të përgjegjësisë morale e shoqërore për të mbajtur gjallë kujtimin e tyre.
“Luboteni përfaqëson qëndresën, dhimbjen dhe dinjitetin e një populli që ruan kujtesën historike dhe vlerat e tij, pa u dorëzuar kurrë,” tha Mexhiti, duke shtuar: “Zoti i mëshiroftë shpirtrat e tyre. Lavdi e përjetshme!”
Masakra e vitit 2001 mbetet një prej episodeve më të rënda të konfliktit në Maqedoninë e Veriut, duke lënë gjurmë të thella në memorien historike të shqiptarëve të vendit.
