Në emisionin “Hajde flasim” në TV21, kandidati për kryetar të Komunës së Çairit nga koalicioni VLEN, Izet Mexhiti, ka folur për një nga projektet konkrete që pritet të lehtësojë jetën e qytetarëve, vendosjen e ashensorëve në ndërtesat e vjetra 4 dhe 5 katëshe që nuk kanë një të tillë.
Mexhiti tha se ekipi i ekspertëve, në krye me bartësin e listës Muhamed Murtezin, po punon ngushtë me qytetarët për të identifikuar objektet ku është e mundur vendosja e ashensorëve.
“Aty ku ka mundësi do të vendosim ashensorë, normalisht që te një pjesë nuk ka mundësi për shkak të konstruktit të ndërtesës”, tha ai.
Sipas Mexhitit, deri më tani janë detektuar 81 ndërtesa 4-5 katëshe që nuk kanë ashensorë. Ai theksoi se ky projekt do të jetë një lehtësim i madh për banorët, sidomos për të moshuarit dhe personat me nevoja të veçanta.
“Krejt kjo kushton diku 2 milionë euro. Mjetet do të sigurohen nga kredia hungareze, përmes së cilës ndahen mjete në bazë të kriterit të numrit të banorëve. Nga 8 milionë euro të kredisë hungareze, 2 milionë euro do të dedikohen për ashensorët”, sqaroi Mexhiti.
Ky projekt, sipas tij, është dëshmi e qasjes konkrete dhe lehtësuese që VLEN po sjell në menaxhimin komunal.
