Mexhiti-Lapaj: Diskutim për bashkëpunim dhe forcimin e marrëdhënieve mes shqiptarëve në rajon

Zv/Kryeministri i parë i Qeverisë, Izet Mexhiti, ka zhvilluar një takim të rëndësishëm me përfaqësuesit e koalicionit “NISMA SHQIPËRIA BËHET”, të udhëhequr nga Adriatik Lapaj, Endrit Shabani dhe Panajot Soko. Përmes një postimi në rrjetet sociale, Mexhiti u shpreh se biseda ishte e frytshme dhe u fokusua në zhvillimet aktuale në Shqipëri, Kosovë, Maqedoninë e Veriut dhe rajonin më gjerë të Ballkanit. Ai theksoi se ndau me delegacionin shqiptar ecurinë e projekteve qeveritare që kanë për synim avancimin e të drejtave dhe interesave të shqiptarëve, si dhe forcimin e lidhjeve me Shqipërinë. Nga ana tjetër, përfaqësuesit e “NISMA SHQIPËRIA BËHET” prezantuan vizionin dhe programin e tyre politik për zgjedhjet parlamentare të 11 majit, duke shprehur ambiciet për drejtimin e ardhshëm të qeverisë shqiptare. Ata theksuan rëndësinë e një politike të re, transparente dhe të orientuar drejt qytetarit. Gjatë takimit, palët u dakorduan për bashkëpunim të ngushtë në të ardhmen, në funksion të përmirësimit të marrëdhënieve ndërshqiptare dhe përfaqësimit të denjë të interesave të shqiptarëve në arenën ndërkombëtare. Takimi u vlerësua si një hap i rëndësishëm drejt ndërtimit të një bashkëpunimi të qëndrueshëm mes liderëve politikë shqiptarë në rajon.