Ministri i Mjedisit Jetësor, Izet Mexhiti, u bëri thirrje organeve hetimore të zbardhin rastin e kompanisë “ASD Metal Grup” nga Vizbegu, për të cilën prokuroria konstatoi se kishte ruajtur skrap për një periudhë të gjatë kohore në një vend për të cilin nuk kishte leje. Përveç kësaj, më 9 korrik, në depo shpërtheu zjarr dhe gjatë djegies së materialeve, shërbimet kompetente përcaktuan ndotje të konsiderueshme të ajrit. Mexhiti bëri thirrje që pronarët e kompanisë të ndëshkohen në mënyrë adekuate.
“Inspektoratet kanë vepruar dhe kanë konfirmuar që ka punuar pa leje. Inspektoratet dhe institucionet kanë bërë punën e vet sidomos gjatë ditëve ku ka rreziqe për zjarre duhet pasur kujdes më të madh, pra nuk i janë përmbajt kësaj. E dyta, është konstatuar që ka punuar pa leje. Mendoj dhe bëj apel që edhe gjyqësia, organet gjyqësore ta vërtetojnë këtë shkelje të ligjit dhe të marrin dënimin e merituar që të jetë një mësim për të tjerët”, tha Izet Mexhiti, Ministër I Ekologjisë.
Pas zjarrit, ekipet e posaçme të Ushtrisë kryen inspektime në terren, të cilat me kërkesë të prokurorit publik matën ndotjen e ajrit. Megjithëse prokuroria konfirmoi se kishte ndotje të konsiderueshme, nuk zbardhi detaje të gjetjeve në terren.
“Ne nuk jemi në gjendje të ndajmë provat në procedurë në këtë fazë”, njoftojnë nga Prokuroria Themelore Publike.
Prapa ASD Metal Grup qëndron Aleksandar Nikollçev si pronar joformal, ndërsa gruaja e tij është pronare e vërtetë e kompanisë. Ata të dy sulmuan verbalisht dhe fizikisht ekipin e Alsatit derisa raportonim për zjarrin, tymi i të cilit mund të shihej nga çdo cep i qytetit. Pas këtij sulmi ka reaguar edhe policia, ndërsa Nikollçev dhe bashkëshortja e tij u ndaluan, ndërsa në gjykatë kërkuan falje për sulmin. Aleksandar Nikolçev është person me të kaluar kriminale, i njohur nga autoritetet e përndjekjes, i cili është me origjinë nga Velesi, dhe në vitin 2013 ai u arrestua dhe u dënua si pjesë e grupit që punon për Mafian e Frankfurtit. /Alsat.mk
