Të mbledhur në anfiteatrin veror në parkun e qytetit, gostivarasit dëgjuan kreun e Lëvizjes së Re demokratike Izet Mexhiti. Ai drejtoi akuza ndaj ish partiakëve të tij duke thënë se fronti evropian nuk bëhet me njerëz të listave të zeza.
Mexhiti nga Gostivari i bëri thirrje Aleancës për Shqiptarët t’i bashkangjitet në frontin opozitar që sipas tij të bëjnë ndryshimin e madh.
“Faleminderit nga zemra Gostivari i proceseve të mëdha kombëtare! Ne nuk e kemi dert që me qeveritarët nuk i kemi punët mirë, sepse për ne në vend të parë është SOVRANI, është qytetari! Nga këtu duam që të çojmë porosi deri tek ata pjestarë të Qeverisë që natyrshëm e kanë vendin tek ne, tek fronti opozitar, të bashkangjiten që bashkarisht ta bëjmë ndryshimin e madh, ta bëjmë bashkë fillimin e ri!”, tha Izet Mexhiti.
Ndryshe ditë më parë Izet Mexhiti dhe Merita Koxhaxhiku kanë njoftuar se do të veprojnë si deputetë të pavarur në Kuvendin e Maqedonisë së Veriut dhe kështu shkëputen edhe në Kuvend nga BDI-ja. Mexhiti paralajmëroi lëvizje të re politike që do të promovohet më 13 gusht./KlanMacedonia
