Me Ali Ahmetin vazhdojmë të kemi komunikim, por kemi dallime dhe nuk po arrijmë të merremi vesh, ka deklaruar nënkryetari Izet Mexhiti nga Tetova ku ka takuar aktivistë partiak të cilët janë të pakënaqur me politikat e ekzekutivit apo konkretisht të zëvendëskryeministrit, Artan Grubi. Sipas tij, takimet e grupit të zjarrit me qytetarë e dëshmojnë se në BDI nuk janë vetëm dy apo tre persona të pakënaqur, por janë me mijëra qytetarë, votat e të cilëve mund të jenë determinuese në zgjedhjet e ardhshme parlamentare.
“Nuk kemi hasmëri, kemi dallime politike. Ne po e themi publikisht se ka një tendencë për tjetërsimin e formës së BDI-së dhe ne jemi konsekuent në këtë që e themi, i rrimë mbrapa dhe nuk ndryshojmë. Nuk jemi si Artani, i cili shtrin dorën e pajtimit, ndërsa në mbrëmje në qeveri i shkarkon nga pozita të gjithë ato që mendojnë ndryshe ose nuk pajtohen me z. Grubi.”, – deklaroi nënkryetari i BDI-së, Izet Mexhiti.
Mexhiti gjithashtu pati kritika edhe në lidhje me fushatën. Ai po vjen, duke thënë se Artan Grubi në momente paniku po shpik tema që tentojnë të defokusojnë opinionin.
