Zëvendëskryeministri i parë i Qeverisë së Maqedonisë së Veriut, Izet Mexhiti, mori pjesë në Samitin Ekonomik Ballkanik “Rumelisiad”, ku theksoi rëndësinë strategjike të investimeve të huaja dhe forcimin e bashkëpunimit ekonomik rajonal për ndërtimin e një ekonomie të qëndrueshme dhe konkurruese.
“Parimet e bashkëpunimit, zhvillimit dhe integrimit ekonomik janë udhërrëfyesit tanë në politikën ekonomike,” tha Mexhiti, duke nënvizuar përkushtimin e Qeverisë për të krijuar një klimë të favorshme për investitorët e huaj përmes stabilitetit politik dhe ekonomik, mbështetjes institucionale dhe transparencës në marrëdhëniet me biznesin.
Ai vuri në dukje rolin e veçantë të Turqisë si partner strategjik, duke theksuar se investimet turke në vend nuk janë vetëm përfitime ekonomike, por edhe ura bashkëpunimi që pasqyrojnë ndjeshmëri ndaj komuniteteve lokale dhe trashëgimisë së përbashkët kulturore.
Në këtë kuadër, Mexhiti përmendi hapjen e fabrikës Shahterm si shembull të suksesit të bashkëpunimit ekonomik mes dy vendeve. “Shahterm nuk është thjesht një kompani – është partneri ynë në ndërtimin e një të ardhmeje më të mirë për Maqedoninë e Veriut,” deklaroi ai.
Zëvendëskryeministri Mexhiti ritheksoi se çdo investim cilësor është një hap konkret drejt përmirësimit të standardit të jetesës dhe rritjes së kapaciteteve prodhuese në vend.
