Zëvendëskryeministri i parë dhe kandidati i koalicionit Vlen për kryetar të Komunës së Çairit, Izet Mexhiti, zhvilloi takim me lojtarët dhe drejtuesit e klubit të basketbollit Çair 2030, një ndër historitë më të suksesshme të sportit vendor në dekadën e fundit.
Ky klub, që nisi nga një grup i vogël entuziastësh, sot garon në Superligën e Maqedonisë së Veriut, duke përfaqësuar me dinjitet komunën dhe duke inspiruar brezat e rinj.
“Çairi ka një histori të pasur në sport. Është koha që kjo histori të mbështetet me përkushtim institucional, sepse sporti nuk është vetëm lojë është edukim, karakter, shëndet dhe krenari,” theksoi Mexhiti gjatë vizitës në ambientet e klubit.
Ai vlerësoi punën e trajnerit Erhan Ramadani, që me vizion dhe qasje profesionale po udhëheq ekipin drejt rezultateve të reja, dhe ritheksoi përkushtimin që, si kryetar i ardhshëm i Komunës së Çairit, do ta ketë për:
Mbështetje të strukturuar për klubet dhe sportistët e rinj;
Investime në infrastrukturën sportive moderne dhe të qasshme për të gjithë;
Politika të qarta për zhvillimin e jetës rinore dhe kulturore në komunë.
Komuna e Çairit, siç u tha në takim, ka vënë hapësirat sportive në shërbim të klubit pa pagesë, duke u siguruar që basketbollistët të kenë kushte të përshtatshme për stërvitje dhe gara. Mexhiti mori gjithashtu një fanellë simbolike nga klubi, si shenjë mirënjohjeje për mbështetjen e dhënë.
“Kur investojmë në sport, investojmë në të ardhmen e fëmijëve tanë dhe në një Çair më të fortë. Rinia është pasuria jonë më e madhe dhe duhet të ketë hapësirë për të lulëzuar,” tha mes tjerash Mexhiti.
Si kandidat i koalicionit Vlen, Mexhiti po zhvillon një fushatë që mbështetet në përvojën, vizionin dhe besimin në potencialin e qytetarëve të Çairit, duke e konsideruar sportin si një shtyllë kyçe të zhvillimit lokal.
