Kandidati i koalicionit VLEN për kryetar të komunës së Çairit, Izet Mexhiti, në hapjen e shtabit lokal të nëndegës “Kongresi i Manastirit”, ka reaguar ndaj akuzave se projektet e fundit në Çair përbëjnë keqpërdorim të Qeverisë.
Mexhiti theksoi se për të sjellë një projekt në realizim kërkohet punë dhe përkushtim.
“Për të ardhur në realizim një projekt duhet të kesh ide, të bësh projektin, të marrësh lejen, ta kalosh në buxhet, të hapësh procedurë tenderimi dhe të fillojë realizimi. Ne kemi punuar një vit që sot bagerat të jenë gjithëkund nëpër Çair,” tha ai.
Duke replikuar ndaj kundërshtarëve të tij politik, Mexhiti shtoi: “Abuzim nuk është kur punon për Çairin prej në Qeveri. Abuzim është kur je 8 vjet në Qeveri – Zëvendëskryeministër, ministër i punëve të jashtme, ministër i integrimit, ministër i se di çkahit – edhe në fund asnjë bager, asnjë projekt, asnjë të mirë për Çairin.”
Ai u shpreh se nëse investimet në Çair quhen abuzim, atëherë është i gatshëm të bëjë edhe më shumë që t’i kthehet borxhi Çairit për atë që historikisht i ka dhënë Shkupit dhe shqiptarisë.
“Nëse është kjo abuzim, ne do abuzojmë edhe më shumë. Jo vetëm Qeverinë, por edhe Qytetin e Shkupit, edhe ndërmarrjet e Qytetit të Shkupit do i ‘abuzojmë’, dhe do u bëjmë presion që t’ia kthejnë borxhin Çairit, sepse Çairi historikisht ka bërë shumë për Shkupin dhe për shqiptarët, në çdo dimension – kulturor, fetar, kombëtar. Kur nuk ka pas hise në buxhet, esnafi i Çarshisë i ka ndejt mbrapa” – theksoi Mexhiti.
