Gjatë ditëve të fundit kemi vizituar të gjitha shkollat e Çairit, për t’u siguruar që çdo gjë është gati për fillimin e vitit të ri shkollor. Aty ku ka pasur nevojë, kemi nisur menjëherë investimet e duhura, ndërsa paralelisht është bërë edhe pastrimi gjeneral i të gjitha shkollave. Kështu, nxënësit tanë do ta nisin vitin e ri në ambiente të pastra, të sigurta, dhe të përshtatshme për mësim.
Këto vizita i përmbyllëm në Shkollën “Vasill Gllavinov”, e cila është një shembull i shkëlqyer i bashkëjetesës sonë, ku fëmijë nga të gjitha bashkësitë etnike, mësojnë së bashku. Ashtu si në shkollat tjera, edhe këtu kemi investuar aty ku është parë më e domosdoshme, me synimin që çdo nxënës të ketë kushte të barabarta për mësim cilësor.
Këto përgatitje nuk janë të rastësishme. Sepse vetëm në këtë vit, afro 1000 fëmijë do ta fillojnë për herë të parë rrugëtimin e dijes në bankat e shkollave të Çairit. Dhe për ta, por edhe për çdo nxënës tjetër, kemi një obligim të madh: të sigurojmë mësim sa më cilësor, dhe kushte më të mira.
Për këtë arsye po punojmë që mësimi në Çair të zhvillohet vetëm në një ndërrim. Këtë model do ta nisim më 1 Shtator në SHF “Kongresi i Manastirit”, për ta zgjeruar më pas edhe në shkollat e tjera. Në këtë mënyrë, fëmijët tanë do të kenë më shumë kohë për të mësuar, për të marrë pjesë në aktivitete, për të zhvilluar talentet e tyre, dhe për të gëzuar një fëmijëri të shëndoshë.
Këto rezultate nuk do të ishin të mundura pa bashkëpunimin e drejtorive të shkollave dhe stafit të tyre. Ndaj, një falënderim i veçantë shkon për ta, për pritjen, për angazhimin dhe për përkushtimin që treguan në çdo hap të këtij procesi.
