Zëvendës kryeministri i parë dhe njëherit kandidat i Vlen për komunën e Çairit Izet Mexhiti, gjatë fjalimit të mbajtur sot në Gazi Babë tek familja Dolek, tha se vizioni i tij dhe i ekipit të tij është që Çairi të transformohet në një “qytet studenti”, duke sjellë investime të mëdha në arsim, infrastrukturë dhe projekte zhvillimore.
Mexhiti theksoi se qeveria tashmë ka ndarë 25 milionë euro, të cilat do të shfrytëzohen për dy projekte madhore: përfundimin e sheshit “Skënderbeu” dhe revitalizimin e Çarshisë së Vjetër, parking nëntokësor me dy kate dhe hapësira të gjelbra për aktivitete të ndryshme.
Ai shtoi se vetëm nga kredia hungareze prej 1 miliard euro, në Çair janë planifikuar investime kapitale.
“Sa i përket infrastrukturës nëntokësore, këtë mandat do ta përmbyllim. Në Gazi Babë është kryer, në Dizhon jemi duke e finalizuar ujësjellësin, ndërsa po punohet edhe në Sahat Kullë” u shpreh Mexhiti.
Në arsim, ai theksoi se Çairi aktualisht ka 9 shkolla fillore, por plani është që gjatë këtij mandati të ndërtohen edhe 3 të reja, ku njëra do të jetë e dedikuar për fëmijët me nevoja të veçanta.
“Qëllimi është që shkollat të kenë më pak nxënës, kushte më të mira dhe prindërit të mos përballen me mësim të turnit të tretë,” tha ai.
Mexhiti prezantoi edhe projektin për kontenierë nëntokësorë, ku aktualisht janë vendosur 5, ndërsa 9 të tjerë do të shtohen deri në fund të vitit, me idenë që Çairi të bëhet komuna e parë pilot pa mbeturina.
Një tjetër projekt madhor që ai paralajmëroi është rruga e Jahja Pashës, për të cilën ka nisur procesi i shpronësimit dhe e cilësoi si prioritetin e parë pas zgjedhjeve.
“Votën nuk e kërkojmë për të mposhtur të tjerët, por si një mundësi të artë që të kemi në duar komunën e Çairit, qytetin e Shkupit dhe ndërmarrjet, të cilat do të jenë në funksion të qytetarëve tanë,” përfundoi Mexhiti.
