Zëvendës kryeministri i parë dhe kandidat i Vlen për kryetar në komunën e Çairit, gjatë intervistës së tij për Pressing në T7 Izet Mexhiti ka vlerësuar se BDI tashmë e ka humbur betejën politike përpara se të hyjë realisht në garën zgjedhore.
Sipas tij, dështimi i kësaj partie është i dukshëm dhe rrëshqitja nga skena politike ka nisur.
“BDI e ka dorëzuar luftën ende pa ia filluar. Po fshihet pas një formati të ri si AKI, që është terciar dhe pa identitet ideologjik. Militanti i BDI-së nuk e sheh më veten në këtë kombinim pa bosht”, u shpreh Mexhiti.
Ai theksoi se nga 12-13 komuna që udhëhiqte, BDI ka propozuar vetëm 6 kandidatë për këto zgjedhje, ndërsa pjesën tjetër ia ka lënë aleancave për mbijetesë, duke i “falur” siç tha, për interesa të ngushta politike.
“BDI sot është barazuar me partitë e reja të vogla. E ka humbur identitetin, e ka dorëzuar betejën në tavolinë dhe po largohet nga përgjegjësia me emërtime të reja që nuk i beson askush,” – shtoi Mexhiti.
Ai gjithashtu theksoi se në ditët e fundit po vërehet një rritje e ndjeshme e përkrahjes për VLEN, madje edhe nga elektorati tradicional i BDI-së.
“Ka një derdhje të votuesve të BDI drejt VLEN. Njerëzit e kanë kuptuar se ndryshimi nuk vjen nga riciklimi, por nga përballja e ndershme politike,” – përfundoi Mexhiti.
