Mbrëmë, kandidati i pavarur për kryetar të Komunës së Strugës, Mendi Qyra, zhvilloi një takim me banorët e fshatit Koroshisht, ku kryefjala ishte shqetësimi i tyre për problemet jetike që i prekin çdo ditë. Banorët ngritën si prioritete urgjente çështjen e ujit të pijshëm dhe kanalizimit, si dhe përmirësimin e infrastrukturës rrugore.
Një vëmendje e veçantë iu kushtua zgjidhjes së problemit të ngricës në hyrje të qytetit, te ura e Morovishtit, një nyje që prej vitesh paraqet rrezik dhe pengesë për qarkullimin normal. Një tjetër temë madhore që u theksua ishte deponia, e cila vazhdon të jetë problem mjedisor dhe shëndetësor për të gjithë banorët e Strugës.
Mendi Qyra garantoi se në programin e tij janë parashikuar masa konkrete për mbylljen dhe menaxhimin e saj në mënyrë afatgjatë. Në takim u diskutua edhe çështja e çerdheve të qytetit. Aktualisht, rreth 400 fëmijë mbeten në lista pritjeje për shkak të kapaciteteve të pamjaftueshme. Qyra premtoi se si kryetar i ardhshëm do të punojë për zgjerimin e kapaciteteve ekzistuese dhe hapjen e çerdheve të reja, duke i dhënë zgjidhje këtij problemi madhor për familjet e reja. `
