Zv/kryeministri i parë dhe ministri i Mjedisit Jetësor dhe Planifikimit Hapësinor, Izet Mexhiti, mori pjesë në një panel diskutimi të organizuar nga Medreseja “Isa Beu” në Shkup, me rastin e integrimit zyrtar të këtij institucioni arsimor në sistemin shtetëror të arsimit.
Mexhiti theksoi rëndësinë e këtij ndryshimi ligjor, duke e cilësuar si një hap historik drejt barazisë dhe drejtësisë për nxënësit e Medresesë. “Me këtë ligj, i kemi dhënë fund një padrejtësie të kahershme,” u shpreh ai.
Sipas tij, ligji i ri garanton të drejta të barabarta për medresantët, ashtu si për nxënësit e tjerë të shkollave të mesme publike. Ky ndryshim është përshëndetur edhe nga Gjykata Kushtetuese, e cila ka dhënë një vlerësim pozitiv për përfshirjen gjithëpërfshirëse të Medresesë në sistemin shtetëror.
Nga tani, Medreseja “Isa Beu” barazohet me të gjitha shkollat e mesme në vend, duke u mundësuar nxënësve të saj të ndjekin studimet e larta në universitete publike dhe private, si brenda ashtu edhe jashtë vendit.
“Ishte koha që të njihnim kontributin e këtij institucioni, që prej dekadash edukon breza me vlera, dije dhe përkushtim ndaj shoqërisë,” përfundoi Mexhiti.
Ky zhvillim shënon një kapitull të ri për arsimin fetar në Maqedoninë e Veriut, duke i dhënë atij vendin e merituar në kuadër të sistemit arsimor kombëtar.
