Mbreti Charles ka folur hapur për herë të parë mbi betejën e tij me kancerin, duke e përshkruar si një përvojë të vështirë dhe të frikshme.
Monarku 76-vjeçar, i cili prej më shumë se një viti po merr trajtim javor për sëmundjen, ka vazhduar të përmbushë detyrat mbretërore me vendosmëri dhe ndjenjë qëllimi.
Gjatë një eventi në Londër të mbajtur në nder të “heronjve të shëndetit” – profesionistëve që kujdesen për pacientët me kancer – Mbreti Charles, i shoqëruar nga Mbretëresha Camilla, shprehu mirënjohjen e tij për punën e tyre të palodhur.
Ngjarja kishte për qëllim të vlerësonte kontributin e atyre që ndihmojnë mbi 390,000 persona të diagnostikuar me kancer çdo vit në Britaninë e Madhe – që përkon me më shumë se 1,000 raste të reja në ditë.
Në një mesazh të përfshirë në programin e eventit, Charles reflektoi mbi përvojën personale me këtë sëmundje: Çdo diagnozë, çdo rast i ri, është një përvojë e frikshme për individin dhe të dashurit e tij. Por si një nga ata që janë pjesë e këtyre statistikave, mund të dëshmoj se ajo mund të nxjerrë gjithashtu në pah më të mirën e njerëzimit.
Mbreti vlerësoi gjithashtu përkushtimin e mjekëve, infermierëve dhe organizatave që ofrojnë kujdes për pacientët me kancer, duke theksuar rolin vendimtar të dhembshurisë në përballjen me sëmundjen: Momentet më të errëta të sëmundjes mund të ndriçohen nga dhembshuria më e madhe.
Kjo dalje publike e Charles-it është konsideruar si një hap i guximshëm për të rritur ndërgjegjësimin dhe për të ofruar shpresë për mijëra njerëz që përballen me të njëjtën sfidë.
