Ka mbërritur në Shqipëri ish-presidenti amerikan Bill Klinton. Avioni me të cili mbërriti ish-presidenti është ulur pak minuta më parë në Rinas.
Është kryeministri Rama ai që po e mirëpret Klinton-in në aeroportin “Nënë Tereza”.
Ish-presidenti së bashku me delegacionin e tij mbërritën në Tiranë në kuadër të një vizite diplomatike me ftesë të qeverisë shqiptare.
Sipas agjendës dy-ditore, sot në orën 19:00 Klinton do të pritet nga Kryeministri Edi Rama në një ceremoni të posaçme zyrtare përpara godinës së Kryeministrisë, ku të pranishëm do të jenë dhe qytetarë të rastit.
Pas ekzekutimit të himneve kombëtare të SHBA-së dhe Shqipërisë, Kryeministri Edi Rama dhe Presidenti i 42-të i SHBA-së Bill Klinton do të bëjnë parakalimin ceremonial dhe do të nderojnë flamujt e dy vendeve.
Në orën 19:05 Kryeministri Edi Rama do të mbajë fjalën e rastit dhe më pas do të ftojë Bill Klinton të marrë çmimin e akorduar.
Në orën 19:25 do të zhvillohet ceremonia e nderimit të Presidentit të 42 të SHBA-së Bill Klinton me “Yllin e Mirënjohjes për Arritjet Publike”.
