Pronarët e Manchester United, Liverpoolit dhe Arsenalit mund të humbasin miliarda euro pas njoftimit të fundit të presidentit Donald Trump.
Trump njoftoi të mërkurën një seri tarifash reciproke ndaj vendeve në mbarë botën, në atë që ai e përshkroi si ‘Dita e Çlirimit’.
Shtëpia e Bardhë ishte arsyetuar se Trump po dëshiron ta zvogëlojë hendekun midis vlerës së mallrave që blen shteti amerikan nga shtetet e tjera dhe vlerën e atyre që u shet atyre.
Sidoqoftë, kjo politikë u përcoll me kritika, jo vetëm për natyrën e tarifave, por gjithashtu edhe për llogaritjet që bëri Shtëpia e Bardhë.
Dhe tregjet botërore të aksioneve nuk kanë reaguar mirë, me indeksin e bursës amerikane Dow Jones që ra në nivelin më të ulët në tetë muajt e fundit të dielën.
The Telegraph ka raportuar se, FTSE 100 – indeksi kryesor i tregut të aksioneve në Britani ka rënë me 6.3 për qind.
United, Liverpool dhe Arsenali janë që të gjitha në pronësi të biznesmenëve amerikanë ose bizneseve amerikane.
Fenway Sports Group me seli në Boston ka në pronësi Liverpoolin, teksa Kroenke Sports me seli në Denver ka kontrollin e plotë të Arsenalit.
Dhe Manchester United, natyrisht, shumica e aksioneve janë në pronësi të familjes Glazer, kompania e së cilës operon në New York.
Bloomberg ka raportuar se sipas Indeksit të Miliarderëve, 500 personat më të pasur në botë kanë regjistruar humbjet më të mëdha në dy ditët e fundit shkaku i tarifave të Trump.
Është raportuar se milarderët të cilët gjenden në listën e personave më të pasur kanë humbur në total 485 miliardë euro që nga hapja e tregjeve të aksioneve të enjten.
