Çmimet e naftës u ulën në 59 dollarë në tregjet ndërkombëtare sot pasi Kina u hakmor kundër tarifave të SHBA-së, duke nxitur frikën e një lufte tregtare që do të ngadalësonte ekonominë globale dhe kërkesën për energji.
Në tregun e Londrës, pas mesditës, një fuçi naftë u tregtua me 3.63 dollarë më të ulët se çmimi i mbylljes së djeshme prej 59.12 dollarësh. Pothuajse me të njëjtën shumë, fuçia u bë më e lirë në tregun amerikan, ku u tregtua me 55.99 dollarë.
Sot, SHBA ngriti tarifat shtesë të paralajmëruara “reciproke” për importet kineze nga 34 në 84 për qind, duke theksuar në shpjegimin e vendimit se Kina iu përgjigj tarifave të reja të paralajmëruara të SHBA javën e kaluar me tarifa 34 për qind për mallrat amerikane.
Kur merren parasysh taksat shtesë nga muajt e mëparshëm, importet kineze në SHBA tani janë subjekt i tarifave prej 104 për qind. Të mërkurën, Pekini u përgjigj duke rritur tarifat nga 34 në 84 për qind.
Ye Lin nga Rystad Energy, tha se përgjigjja agresive e Kinës po zvogëlon shanset për një marrëveshje të shpejtë midis dy ekonomive më të mëdha në botë, duke nxitur frikën e një recesioni në botë.
“Nëse lufta tregtare zvarritet për një periudhë më të gjatë kohore, ajo mund të kërcënojë pjesën e Kinës në rritjen e kërkesës për naftë, e cila është 50.000 deri në 100.000 fuçi në ditë, por humbja mund të kompensohet nga shtytja më e fortë (e Pekinit) për konsumin e brendshëm”, tha Ye.
Organizata e Vendeve Eksportuese të Naftës (OPEC) javën e kaluar njoftoi se Arabia Saudite, Rusia, Iraku, Emiratet e Bashkuara Arabe, Kuvajti, Kazakistani, Algjeria dhe Omani do të rrisin furnizimin me 411 mijë fuçi në ditë në maj.
Vendimi bazohet në një vlerësim të “një marrëdhënieje të vazhdueshme të qëndrueshme ofertë-kërkesë dhe perspektiva pozitive të tregut”.
Në kushte të tilla, çmimi i një fuçie në tregun rus ra nën kufirin prej 60 dollarësh të vendosur nga grupi G7 prej shtatë ekonomive kryesore të zhvilluara për herë të parë të mërkurën, duke kërcënuar siguruesit dhe transportuesit me sanksione nëse transportojnë fuçi më të shtrenjta ruse.
Rënia e mprehtë e çmimeve u zbut vetëm nga shenjat e kërkesës më të fortë amerikane.
Inventarët e naftës së papërpunuar në SHBA ranë me 1.1 milion fuçi javën e kaluar, sipas të dhënave të prodhuesit API. Analistët vlerësuan se të dhënat e API do të tregonin një rritje të inventarëve prej 1.4 milion fuçi, transmeton KosovaPress.
OPEC njoftoi se dje çmimi i një fuçie të shportës së naftës të anëtarëve të tij u rrit me 29 centë në 66.54 dollarë.
