Lirim Jashari ka shpallur kandidaturën si bartës liste për Këshillin e komunës së Likovës nga koalicioni VLEN. Ai me me këtë rast ka premtuar një Likovë më të mirë, më të zhvilluar dhe më të bashkuar.
“Dua të shpreh mirënjohjen time të thellë për besimin që më është dhënë nga koalicioni VLEN dhe nga ju qytetarët e Likovës. Ky besim është nderi im më i madh dhe përgjegjësia ime më e rëndë. I mësuar se lufta për të drejtat dhe dinjitetin e popullit tonë kërkon kurajë, përkushtim dhe vizion, këto vlera i bart me vete në çdo hap të këtij udhëtimi të përbashkët”, tha Jashari.
Për 18 muaj, tha ai koalicioni VLEN ka punuar pa u ndalur, duke sjellë ndryshime të rëndësishme si në nivel qendror, ashtu edhe lokal.
“Kemi dëshmuar se bashkimi ynë është forcë, dhe sot më shumë se kurrë, jemi të gatshëm të çojmë përpara një ndryshim rrënjësor për Likovën tonë të dashur”, u shpreh Jashari.
Ai tha se vizioni i tij për Likovën bazohet në tre shtylla kryesore: bashkim, zhvillim dhe transparencë.
Zotohet se do të jetë një kryesues që dëgjon çdo zë, që bashkon çdo lagje dhe çdo fshat të Likovës.
“Do të krijojmë këshilla lokale qytetare, ku qytetarët do të keni fjalën kryesore për vendimet që prekin jetën e tyre. Së bashku, do të ndërtojmë një komunitet ku askush nuk ndihet i lënë pas dore”, ka thënë Jashari.
Likova, sipas tij meriton ujë të pijshëm, infrastrukturë moderne, shkolla që frymëzojnë, qendra shëndetësore që kujdesen dhe mundësi pune për të rinjtë tanë.
“Programi ynë përfshin investime në infrastrukturë, rrugë të reja, ujësjellës dhe ndriçim publik në çdo fshat. Pastaj arsim dhe inovacion, mbështetje për bujqësinë dhe bizneset lokale si dhe turizmin”, shtoi ai.
Jashari premton transparencë dhe llogaridhënie, duke u zotuar për një qeverisje të hapur, ku çdo qindarkë e buxhetit komunal do të jetë e qartë për qytetarin.
“Unë besoj se Likova meriton diçka të re, diçka që na bën të ëndërrojmë më shumë. Për këtë arsye, propozoj një iniciativë unike: “Likovë 2030” e cila do të jetë një platformë ku çdo qytetar, nga fëmijët deri te të moshuarit mund të ndajë ëndrrën e tij për Likovën”, ka nënvizuar mes tjerash Jashari.
