Ministri i Politikës Sociale, Demografisë dhe Rinisë, Fatmir Limani, mori pjesë sot në ngjarjen finale të projektit “Ndërtimi i kapaciteteve drejt zhvillimit të qëndrueshëm të kapitalit njerëzor në Maqedoninë e Veriut”, i realizuar përmes bashkëpunimit me Shoqërinë Gjermane për Bashkëpunim Ndërkombëtar – GIZ dhe Fondin e Gjelbër Klimatik. Projekti kishte për qëllim përforcimin e kapaciteteve institucionale dhe inkurajimin e zhvillimit të qëndrueshëm dhe gjithëpërfshirës në fushat kryesore: shëndetësi, arsim, punësim dhe politika sociale.
Në fjalën e tij para të pranishmëve, Limani shprehu kënaqësinë që ky projekt hodhi themelet për inkurajimin e vendeve të gjelbra të punës dhe avancimin e politikave të përfshirjes sociale.
“E dimë se ndryshimet klimatike kanë pasoja të thella socio-ekonomike dhe detyra jonë është të minimizojmë rreziqet dhe të sigurojmë mundësi të barabarta për të gjithë qytetarët, veçanërisht për të rinjtë, gratë dhe grupet e cenuara. Në këtë kontekst, është e rëndësishme të theksohet se Plani Kombëtar i Veprimit për mbështetjen e zhvillimit të punësimit të gjelbër, klimatik, me ndjeshmëri gjinore dhe gjithëpërfshirëse, në sektorët kyç të ekonomisë në vend, përmban masa specifike për përshtatjen e tregut të punës me tranzicionin e gjelbër”, theksoi Limani.
Duke rishikuar Klasifikimin Kombëtar të Profesioneve dhe duke përfshirë profesionet e reja të gjelbra, është e mundur që grupet e reja dhe të cenueshme të kenë qasje në punë cilësore dhe të qëndrueshme në të ardhmen.
Gjithashtu, në përputhje me aktivitetet e planifikuara nga Plani Kombëtar i Veprimit, është e mundur që:
∙Integrimi i agjendës së gjelbër në programet e punësimit dhe rikualifikimit të të papunëve, me fokus të veçantë tek të rinjtë, gratë dhe kategoritë e cenueshme;
∙Krijimi i një mekanizmi për monitorimin dhe publikimin transparent të rezultateve të të rinjve të përfshirë NEET (të rinjtë që nuk janë as në arsim dhe as në punësim) në punësimin e gjelbër;
∙Zhvillimi i shërbimeve sociale si funksion i përfshirjes në vendet e punës të zgjuara dhe gjithëpërfshirëse për klimën, ku sipërmarrja sociale do të inkurajohet si një element i rëndësishëm i zhvillimit të gjelbër;
∙Fushata për të rritur ndërgjegjësimin e publikut për nevojën për aftësi të gjelbra, me synimin për të inkurajuar gjeneratat e reja që të fokusohen në profesionet e gjelbra dhe profesionet e qëndrueshme;
∙Promovimi i buxhetimit të përgjegjshëm gjinor në politikat klimatike dhe të punësimit, duke siguruar kështu ndarje të drejta financiare për gratë dhe grupet e margjinalizuara dhe
∙Zhvillimi i programeve për sipërmarrjen e gjelbër dhe inovacionin, të cilat do të ofrojnë mbështetje për startapet dhe bizneset e vogla të orientuara drejt teknologjive dhe praktikave të qëndrueshme..
“Obligimi ynë është të krijojmë politika që do të lidhin programet arsimore me nevojat reale të fuqisë punëtore, duke ofruar mundësi për rikualifikim dhe avancim të shkathtësive”, tha Limani.
Ai theksoi se Ministria e Politikës Sociale, Demografisë dhe Rinisë mbetet e përkushtuar për promovimin e politikave të gjelbra, mbështetjen e rritjes sociale – gjithëpërfshirëse dhe krijimin e mundësive për gjeneratat e reja.
