Në Likovë kanë përfunduar punimet rreth rikonstruimit të tërësishëm të katit të dytë në objektin e Shtëpisë së Shëndetit. Në përurimin e punimeve të sapopërfunduara ishin të pranishëm: ministër i Shëndetësisë, Arben Taravari, i shoqëruar nga zëvendëskryeministri, Arben Fetai, si dhe deputeti i zonës, Rijad Shaqiri.
Drejtori i këtij institucioni shëndetësor, Shkëlqim Musliji, i njoftoi të pranishmit me këtë investim kapital që u realizua së fundmi këtu.
“Erdha t’i shoh ambientet e Shtëpisë së Shëndetit në Likovë. Renovim, përmirësime, jam shumë krenar që drejtori, Shkëlqimi, ka arritur t’i përmirësojë kushtet dukshëm në katin e dytë të Shtëpisë së Shëndetit. Shpresoj që këtë vit, më 2025, ta bëjmë renovimin edhe në katin e parë. Ky është një shembull se si duhet ne si Ministri e Shëndetësisë, por edhe drejtorët ambiciozë të investojnë në Shtëpitë e Shëndetit apo ambulancat, të cilat janë në pjesët rurale të shtetit, sepse vetëm në këtë mënyrë ne mund të zvogëlojmë intensitetin e punës në spitalet e qytetit, pasi që edhe për pacientët që janë fokus i sistemit shëndetësor të marrin shërbime shëndetësore sa më shpejt, sa më lehtë dhe sa më afër tyre.”, – deklaroi ministri i Shëndetësisë, Arben Taravari.
“Një investim shumë i rëndësishëm për të gjithë personelin në Shtëpinë e Shëndetit në Likovë. Gjithashtu prezantuam edhe projektet tona, të cilat i kemi në plan për të ardhmen, si në zgjerimin e shërbimeve specialistike, po ashtu edhe në investimin në katin e parë, për të cilin prezantuam edhe projektin që shpresojmë që së shpejti të bëhet realitet. Brenda një periudhe katërvjeçare do t’i kemi edhe katër shërbime specialistike në Shtëpinë e Shëndetit në Likovë.”, – deklaroi drejtori i Shtëpisë së Shëndetit në Likovë, Shkëlqim Musliji.
Ndryshe, investimi në fjalë përfshinë komplet rikonstruimin e katit të dytë të objektit dhe i njëjti është donacioni nga ambasada kineze në vendin tonë dhe kap vlerën prej 15 mijë eurosh. (TVM2)
