Udhëheqësit evropianë kanë nisur bisedimet në Bruksel në një samit për mbrojtjen dhe ekonominë, që pritet të zgjasë për shumë orë.Presidenti ukrainas, Zelensky do të informojë evropianët rreth bisedës së tij me presidentin Trump një ditë më parë.
Teksa mbërriti në samit, kancelari gjerman në largim Olaf Scholz tha se është vendimtare që Ukraina të jetë një shtet i pavarur sovran dhe të ketë një ushtri të fortë edhe pas arritjes së paqes me Rusinë.
“BE duhet të vazhdojë të ofrojë mbështetje të konsiderueshme për Ukrainën. Shpresoj që Bundestagu t’i miratojë të premten propozimet që kemi bërë kështu që ne kemi fleksibilitetin për të bërë gjithçka që duhet të bëjmë si një shtet i madh në zemër të Europës”, tha Scholz.
Ndërsa kryeministri kroat, Andrej Plenkovic kërkoi më shumë vëmendje ndaj Ballkanit. Ai i ktheu një përgjigje edhe Vuçiç i cili tha se deklarata e nënshkruar në Tiranë mes vendit tonë, Kosovës dhe Kroacisë nuk ishte kërcënim për Serbinë.
“Ai është një memorandum për bashkëpunim trepalësh, nuk ka asnjë karakter armiqësor, kështu që e kuptoj që tani po kërkohen probleme diku tjetër, por në këtë marrëveshje ato nuk ekzistojnë”, tha kryeministri kroat.
Mbledhja e Brukselit nuk do të jetë për vendime të mëdha, por udhëheqësit po diskutojnë rreth mënyrës sesi të financojnë investimet e BE-së për mbrojtjen.
Të gjithë krerët e shteteve europiane pritet të zotohen për mbështetje për Ukrainën përveç Hungarisë. Në draft tekstin e samitit, liderët e BE-së do t’i bëjnë edhe thirrje Rusisë të tregojë vullnet të vërtetë politik për t’i dhënë fund luftës.
