Prokuroria Speciale e Kosovës ka ngritur aktakuzë ndaj Muharrem Ibraj, i nacionalitetit shqiptar, për shkak të dyshimit se ka kryer veprën penale “Krim i luftës kundër popullsisë civile”.
Sipas Prokurorisë, hetimet kanë vërtetuar se i pandehuri, gjatë periudhës 1998-1999 në fshatin Osek Hylë të Komunës së Gjakovës, duke vepruar në bashkëkryerje me pjesëtarë të forcave policore serbe, ka kryer vrasje, dhunime, arrestime dhe keqtrajtime ndaj popullsisë civile shqiptare që nuk ishin të përfshirë në luftë. Prokuroria ka propozuar mbajtjen e gjykimit në mungesë, shkruan Zeri.info.
Por kush është Muharrem Ibraj?
Ibraj në verën e vitit 2005 ishte paraqitur në Hagë, si dëshmitar mbrojtës i kasapit të Ballkanit, Sllobodan Millosheviç.
Ai para luftes dhe gjatë saj ishte, Ish-shefi i “sigurisë lokale” nga zona e Gjakovës dhe në Hagë kishte deklruar se nuk kishte asnjë informacion për ndonjë krim të kryer nga Ushtria Jugosllave dhe policia kundër civilëve shqiptarë në vitin 1999.
Image
Muharrem Ibraj, Hagë 2005
“Vetëm ata shqiptarë që nuk mund të ndaloheshin nga Ushtria Jugosllave u larguan nga Gjakova në pranverën e vitit 1999, policia dhe ushtria i kthyen shqiptarët në shtëpitë e tyre,”, thoshte ai gjatë dëshmisë, duke kundërshtuar akuzat në aktakuzë dhe dëshmitë e dëshmitarëve të prokurorisë, të cilët pretendonin se forcat e RFJ-së dhe Serbisë i dëbuan sistematikisht shqiptarët e Kosovës nga shtëpitë e tyre gjatë fushatës ajrore të NATO-s nga marsi deri në qershor 1999.
Ai thoshte se nuk kishte dëgjuar për ndonjë vrasje të kryer nga forcat e RFJ-së dhe Serbisë, sipas aktakuzës – për shembull, në fshatin Çerim, ku u vranë mbi 50 civilë.
Sipas tij, sulmet ajrore të NATO-s ishin shkaku i largimit të shumë shqiptarëve, duke shtuar se xhamia e Gjakovës, fabrika dhe stacioni i policisë u shkatërruan nga bombat e NATO-s. Kur Millosheviçi e pyeti nëse ishte e mundur që “disa nga policët tanë të kenë shkatërruar shtëpi,” Ibraj u përgjigj se nuk dinte për raste të tilla.
Muharem Ibraj ishte emëruar nga Momçilo Stanojeviç, kryetari i komunës, si shef i “sigurisë lokale”. Një dëshmitar i prokurorisë dëshmoi se kjo forcë sigurie përbëhej nga shqiptarë besnikë ndaj Serbisë. Megjithatë, Ibraj beson se gjëja e rëndësishme ishte se “kudo që vepronte siguria, as serbët dhe as shqiptarët nuk dëmtoheshin.” Ai shtoi se në qershor 1999 ishte i detyruar të largohej nga Kosova dhe se pas dislokimit të KFOR-it, gjashtë anëtarë të familjes së tij u rrëmbyen, pasi nuk bashkëpunonin me UÇK-në. Kur një gjyqtar e pyeti pse nuk e mbështeste UÇK-në, Ibraj u përgjigj: “UÇK-ja ishte kundër shtetit.”
Megjithatë, prokurori në Hagë vuri në dukje se Ibraj dhe njerëzit e tij kishin një “reputacion të kriminelëve të dhunshëm” dhe se kishin abuzuar me shqiptarët vendas.
